Müsavat Partiyasının bəyanatı

“Demokrat” qəzetinin dünənki sayında dövlət başçısı İlham Əliyevin Göy-göl qoruğunda böyük villasının tikintisi haqqında geniş məqalə dərc edilib. Məqalə ictimai rezonansa səbəb olub, bir sıra mətbuat orqanlarında, həmçinin “Azadlıq” radiosunda müzakirə obyektinə çevrilib. Bu, Dubay mülkləri haqqında “Vaşinqton Post” qəzetində dərc olunmuş məşhur məqalədən sonra dövlət başçısının adı hallanan ikinci mülk qalmaqalıdır. Həmin vaxt bir sıra siyasi partiyaların ciddi təkidlərinə baxmayaraq Dubay mülkləri haqqında ictimaiyyətə qaneedici izahat verilmədi. İndiki halda da Ekologiya və Təbii Sərvətlər Nazirliyinin Göy-göldə tikilən mülklə bağlı izahatı qaneedici deyil. Ona görə də Müsavat Partiyası hakimiyyətdən, ilk növbədə dövlət başçısından məsələyə hərtərəfli aydınlıq gətirməsini tələb edir.

isagambar.az, 18 iyun 2010-cu il, Bakı