Müsavat
Partiyasının başqanı İsa Qəmbər 20 Yanvar Ümumxalq Hüzn günü ilə bağlı
Azərbaycan xalqına müraciət edib. Müraciətdə deyilir: Əziz soydaşlarım!
Bu il 1990-cı ilin 20 yanvar hadisəsinin 20-ci ildönümü tamam olur. Həmin dövrdə xalqımız Sovet İmperiyasının zülmünə qarşı dözməyərək milli-azadlıq mübarizəsinə qalxdı. Mənfur sovet imperiyasını qoruyub saxlamağa çalışan Moskva başbilənləri Azərbaycanda vüsət almış milli-azadlıq hərəkatını boğmağa çalışırdılar. Sovet qoşunlarının amansız vəhşiliyi nəticəsində yüzlərlə insan şəhid olmuş və yaralanmışdılar.
Qanlı Yanvar hadisələri Azərbaycan xalqını mübarizlik yolundan döndərə bilmədi. Əksinə, xalqımıza qarşı edilən bu vəhşilik Sovet İmperiyasının dağılması prosesinə daha böyük təkan verdi. Bu qanlı tarix Azərbaycan xalqının öz azadlığı uğrunda mübarizəsinin qəhrəmanlıq simvoluna çevrildi. Müstəqil Azərbaycanın vətəndaşları hələ də həmin acılı günləri böyük qürur hissi ilə xatırlayırlar. Həmin günlər xalqımızın yaddaşına həm matəm və hüzn günü kimi, həm də oyanış, milli azadlığa qovuşmağımız yolunda hərəkat dövrü kimi həkk olunub. Məhz həmin şərəfli tarixdən sonra qəhrəmanlıq nümunələrini əxz edən xalqımız özünün əbədi müstəqilliyinə qovuşdu.
Biz bu müqəddəs gündə 20 Yanvar şəhidlərinin ailə üzvlərinə, yaxınlarına və bütün xalqımıza başsağlığı verərək onları əmin etmək istəyirik ki, Müsavat Partiyası haqq dünyasına qovuşmuş bu insanların müqəddəs ideallarına həmişə sadiq qalacaq, Azərbaycanın müstəqilliyinin qorunması, ərazi bütövlüyünün bərpası və bu ölkənin demokratik dəyərlərə qovuşması üçün bütün qüvvəsini sərf edəcək.
Tanrı Azərbaycanımızı qorusun!