“AXCP-Müsavat” siyasi partiyalar blokunun bəyanatı

“AXCP-Müsavat” siyasi partiyaların bloku bildirir ki, indiki parlament seçkilərinin başlamasından qısa vaxt keçməsinə baxmayaraq, passiv seçki hüququnun həyata keçirilməsində artıq müəyyən əngəllər yaradılır. Belə maneələr xüsusən siyasi partiyaların blokundan irəli sürülən namizədlərə imza vərəqələrinin verilməsi ilə bağlı məhdudiyyətlərdə özünü göstərir.

Azərbaycan Respublikası Seçki Məcəlləsinin 55-ci maddəsinə əsasən bütün namizədlər bərabər hüquqa malikdir və bərabər vəzifələr daşıyırlar. Həmin Məcəllənin 59-cu maddəsinə əsasən müvafiq seçki komissiyası bu Məcəllə ilə müəyyənləşdirilmiş sənədlərdə, hər bir namizədin imza vərəqələrində olan məlumatların düzgünlüyünü və namizədlərin irəli sürülməsi prosedurunun bu Məcəllənin tələblərinə uyğunluğunu yoxlayır.

Seçici imzalarını toplama prosesində imza vərəqələrində texniki və obyektiv səhvlərin olması qaçılmazdır. Ona görə də qanunla müəyyən olunmuş 450 imzadan artıq imza toplanmasını zəruridir. Dairə seçki komissiyaları tərəfindən imza vərəqələrinin verilməsinin sayı ilə bağlı Seçki Məcəlləsində və ya təlimatlarda qadağa qoyulmayıb. Digər tərəfdən, Azərbaycan Respublikası Konstitusiyasının 71-ci maddəsinin 9-cu bəndinə əsasən hər kəs qanunla qadağan olunmayan hərəkətləri edə bilər. Namizədlərə əlavə imza vərəqələrinin verilməsi Seçki Məcəlləsində və ya təlimatlarda qadağa qoyulmadığı halda, bəzi namizədlərə əlavə və kifayət qədər imza vərəqələri verilməmişdir. Belə ki, 2 saylı Şərur seçki dairəsində 9 imza vərəqəsi (cəmi 450 imza üçün), 26 saylı Sabunçu birinci, 89 saylı Göyçay-Ağdaş, 95 saylı Tərtər seçki dairələrində 10 imza vərəqəsi verilib. Bununla da namizədlər barəsində Konstitusiyanın 71-ci, Seçki Məcəlləsinin 55-ci maddəsinin tələbləri kobud şəkildə pozulub.

“AXCP-Müsavat” siyasi partiyaların bloku hesab edir ki, dairə seçki komissiyalarının blokun namizədlərinə belə münasibəti məqsədli xarakter daşıyır və həmin namizədlərin qeydə alınmasında süni problemlərin yaranmasına xidmət edir. Namizədlərin qeydə alınmasının alternativ variantı kimi seçki girovunun (qeydiyyat depozitinin) ləğv edildiyi indiki halda bu cür qanusuzluq “zəruri sayda seçici imzalarının toplanmaması” bəhanəsi ilə blokun namizədlərinin qeydiyyatında ciddi problemlərin yaradılacağı ehtimalını gücləndirir.

“AXCP-Müsavat” siyasi partiyaların bloku bundan ciddi narahatlığını ifadə edərək bəyan edir ki, belə bir hal indiki seçkilərdə namizədlərin bərabər imkanlar prinsipinin kobud şəkildə pozulmasıdır.

“AXCP-Müsavat” siyasi partiyaların bloku siyasi hakimiyyəti bərabər rəqabət imkanlarını əsaslı şəkildə məhdudlaşdıran və seçkilərin qanuniliyini indidən şübhə altına alan belə arzuolunmaz halın dərhal aradan qaldırılmasını tələb edir.

isagambar.az, 22 sentyabr 2010-cu il, Bakı