Növbəti toplantı
Bu gün Müsavat Partiyasının Divanının növbəti toplantısı keçirilib. Qərarların
icra vəziyyəti və görülən işlərə baxıldıqdan sonra partiyadaxili məsələlər və
parlament seçkilərinə hazırlığın gedişi müzakirə edilib.
Arif Hacılı və Arzu Səmədbəyli Şəki şəhərində qonşu rayon təşkilatlarının da
iştirakı ilə keçirilən zona müşavirəsi barədə məlumat veriblər.
Yığıncaqda daşqınlarla bağlı fəlakət zonasındakı vəziyyət müzakirə edilib.
Toplanmış informasiyalar və mütəxəssis rəyləri əsasında durum bir daha
dəyərləndirilib. Fəlakətin qarşısının alınması üçün məsələnin diqqətdə
saxlanılması zərurəti və Müsavat Partiyasının imkan daxilində hər cür köməklik
etməyə hazır olması bir daha bəyan edilib.
Daha sonra kütləvi aksiyalar haqqında məsələ müzakirə edilib. Müsavat
Partiyasının kütləvi aksiyalar keçirməkdə israrlı olduğu qeyd edilərək etiraz
aksiyasının iyun ayının birinci ongünlüyündə hədəfləndiyi bildirilib. Divanın
növbəti toplantısında vəziyyəti bir daha dəyərləndirərək mitinqin günü haqqında
qərar vermək qərara alınıb.
28 May Cümhuriyyət gününün qeyd edilməsi ilə bağlı fikir mübadiləsi davam
etdirilib. Əvvəlcədən qərara alındığı kimi DUİ ilə birlikdə mayın 28-də, saat
14:00-da Novxanı qəsəbəsində Məhəmməd Əmin Rəsulzadənin abidəsi önündə bayram
tədbiri keçirilməsi istiqamətində tapşırıq və tövsiyələr verilib.
Toplantının sonunda cari məsələlərə baxılıb.
isagambar.az, 24 may 2010-cu il, Bakı