Müsavat Partiyasının Bəyanatı

Parlament seçkilərini total saxtakarlıqla keçirən hakimiyyət seçkilərdən sonra ölkədə müxalifəti və müxalif fikirli insanları susdurmaq üçün ardıcıl repressiyalara başlayıb. Şərur rayonunda deputatlığa namizəd Səxavət Əliyevin qardaşı Sabit Əliyev qeyri-qanuni olaraq həbs edilib və bir həftə həbsdə saxlanılandan sonra sərbəst buraxılsa da, ona qarşı təqiblər səngimir. Müsavat Partiyası Şahbuz rayon təşkilatının sədri Məmmədqulu Əliyev və onun oğlu orta məktəb müəllimi vəzifəsindən azad ediliblər. M. Əliyev hazırda buna etiraz edərək aclıq aksiyası keçirir. Göyçaydan müstəqil namizəd kimi seçkiyə qatılmış vəkil Vidadi İsgəndərovun özünə və ailə üzvlərinə təzyiqlər edilir, onu seçkilərdə sərgilədiyi mövqeyə görə cəzalandırmaq istəyirlər.

Müsavat Partiyası bu qanunsuzluqları, təqib və təzyiq kampaniyasını yuxarıdan verilmiş siyasi sifarişin nəticəsi kimi qiymətləndirir və bütün bunlara son qoyulmasını tələb edir. Partiya habelə bəyan edir ki, bu cür repressiv metodlarla xalqı və müxalifəti susdura bilməyəcəklər.

isagambar.az, 24 noyabr 2010-cu il, Bakı