İSA QƏMBƏR AD GÜNÜNDƏ ÖZ BLOQUNU TƏQDİM ETDİ

Müsavat Partiyasının başqanı İsa Qəmbər özünə bloq yaradıb. Fevralın 24-də, öz ad günündə oxuculara təqdim etdiyi bu bloqda “Özüm haqqında”, “Videolarım”, “Qeydlərim”, “Müsahibələrim”, “Çıxışlarım” kimi bölümlər var.

Bloqun açılışını “Video-söhbət/İlk söz” başlıqlı 9 dəqiqəlik videoçarxla gerçəkləşdirən İ.Qəmbər “Media forum” saytına açıqlamasında belə deyib: “Əslində mən bunu daha çox video-bloq kimi düşünürəm, əsas ideya budur. Böyük yola kiçik addımlarla başlamışıq, görək necə olacaq”.

İsa Qəmbər 1957-ci ildə Bakıda anadan olub. Bakı Dövlət Universitetinin tarix fakültəsini bitirib. 1979-82-ci illərdə Milli Elmlər Akademiyasının Naxçıvan Elm Mərkəzində, 1982-90-cı illərdə Şərqşünaslıq İnstitutunda elmi işçi vəzifələrində çalışıb.

Fəal siyasətə 1988-ci ildən qoşulub. Milli azadlıq hərakatının liderlərindən biridir. 1992-93-cü illərdə Milli Məclisin sədri olub. 18-ci ildir Müsavat Partiyasına başqanlıq edir.

«Media forum», 24 fevral 2010-cu il, Bakı

http://mediaforum.az/articles.php?lang=az&page=00&article_id=20100224065441880