MÜXALİFƏT İLHAM ƏLİYEVİN İSTEFASINI TƏLƏB
ETDİ
Müsavat Partiyasında toplaşanlar iqtidarı topa tutdular; istefa
tələbini reallaşdırmaq üçün hərəkətə keçildiyi elan olundu
Dünən Müsavat Partiyasının qərargahında “Əliyevlərin Dubay mülkləri” mövzusunda
müxalifət partiyalarının və ziyalıların iştirakı ilə dəyirmi masa keçirildi.
Tədbirin aparıcısı Müsavat Partiyasının başqanı İsa Qəmbər ictimai rəyin
problemlə bağlı düzgün məlumatlandırılmasını təmin etmək və mövcud vəziyyətdə
xalqın, demokratik ictimaiyyətin bu istiqamətdə nələri etməli olduğu barədə
məsləhətləşmək üçün dəyirmi masanı təşkil etdiklərini bildirdi: “Mövzu kifayət
qədər həssas mövzudur. Çünki Azərbaycan kimi çətin və böyük problemlərin
məngənəsində olan bir məmləkətdə, torpaqlarının bir hissəsi işğal altında olan,
yüz minlərlə qaçqını olan, müdhiş bir işsizlik səviyyəsi olan ölkədə, maaşların,
pensiyaların normal dolanmağa imkan vermədiyi bir dönəmdə dövlət başçısı İlham
Əliyevin Dubayda 11-12 yaşlı oğlu üçün 44 milyon dollar həcmində mülklər alması
faktı ortaya çıxıb.
Bunu ”The Washington Post" kimi dünyanın birinci üçlüyünə daxil olan qəzet
yazıb. Bu cür qəzetlər hər hansı bir faktı ortalığa çıxarmazdan əvvəl hərtərəfli
araşdırmalar aparır. Əslində bu fakt öz-özlüyündə şok effekti yaratsa da
ölkəmizdə dəhşətli bir korrupsiya şəbəkəsinin yaranması heç kimə sirr deyil. Bu
korrupsiya şəbəkəsinin başında da dövlət başçısının dayanması heç kim üçün sirr
deyil. Aydın məsələdir ki, Dubayda alınan 75 milyonluq mülklər bu dövlət
başçısının korrupsiya ilə topladığı sərvətinin çox cüzi bir hissəsidir. Burada
dənizdə bir damladan söhbət gedir.
Ancaq eyni zamanda dənizdəki bu damla problemlər məngənəsində olan Azərbaycan
üçün həddən artıq böyük bir məbləğdir. Bu məbləğlə Azərbaycanın bir çox
problemlərini həll etmək, ayrı-ayrı təbəqələrin maaşlarını, pensiyalarını
əhəmiyyətli dərəcədə artırmaq olar. Bu məbləğlə ordunu əhəmiyyətli dərəcədə
gücləndirmək olar. Hazırda dünya bazarında tankların qiyməti tutaq ki, 1-2
milyon dollar civarındadır. Ən müasir tankların qiyməti 5 milyon dollardan
aşağıdır. Bu gün ordumuzda zabitlərin maaşı onların normal yaşayışına imkan
vermir. Zabitlərimizin maaşını əhəmiyyətli dərəcədə yüksəltmək mümkündür. Bu
günlərdə bir gənc alimin mətbuatda yazısını oxuduq ki, bu adam 90 manat maaşla
yaşayır. 75 milyon dollarla Azərbaycanda bütün alimlərin maaşını ciddi şəkildə
artırmaq mümkündür. 44 milyon dollar Azərbaycanda elmin inkişafına bir ildə
ayrılan pulun yarısıdır. Gerçək budur ki, Dubayda mülklər almağa sərf edilən
həmin pullar İlham Əliyevin pulları deyil. Bu, Azərbaycan xalqının puludur. O
mülklər Azərbaycan xalqından oğurlanmış pulların hesabına alınıb".
İ.Qəmbər vurğuladı ki, bu məsələyə prinsipial mövqe bildirilməsi həddən artıq
önəmlidir: “Azərbaycanda fəaliyyət göstərən bir sıra siyasi qüvvələr, ekspertlər
artıq buna münasibət bildirib. Hesab edirəm ki, bu prinsipial münasibəti bizim
daha çox qüvvədən gözləməyə əsasımız, haqqımız var. Eyni zamanda hakimiyyətin bu
faktı inkar etməməsi, dolayısı yolla təsdiq etməsi, sonra da gülünc bəhanələrlə
müdafiə eləməyə çalışması da diqqətdən yayınmamalıdır. Bu faktlara, saxta
arqumentlərə də diqqətdən yayınmamalıdır. Guya İlham Əliyevin öncələr çox ciddi
biznesinin olması barədə arqumentlər gətirirlər. Heç bir məntiqə sığmayan
arqumentdir. Ən azı bu adam bir neçə dəfə parlamentə, bir neçə dəfə də
prezidentliyə namizəd olub. Namizədliyini irəli sürərkən öz mülkiyyəti haqqında
rəsmi məlumat hazırlayıb və imzalayıb Mərkəzi Seçki Komissiyasına təqdim edib.
Və biz Heydər Əliyevin 1993-cü ildə hakimiyyətə gələrkən xalqa şikayətlənməsini
də unutmamışıq ki, onun yalnız bir kostyumu və həddən artıq çətin həyat şəraiti
varmış. Yəni bu faktlar hamısı yaddadır. Mən hesab edirəm ki, bu hakimiyyətdən
izahat tələb edilməsi, əgər inandırıcı izahat yoxdursa, dövlət başçısının istefa
verməsi barədə tələb tamamilə haqlı olaraq gündəmə çıxıb. Bu tələbin reallaşması
demokratik qüvvələrin əsas hədəflərindən birinə çevrilməlidir. Və bu istiqamətə
çox ciddi işlər görülməli, yalnız sözdə deyil konkret tədbirlərlə, əməli
fəaliyyətlə gerçəkləşdirilməyə çalışılmalıdır. Müsavat Partiyası bu yöndə
fəaliyyət göstərmək haqqında qərarlarını artıq qəbul edib. Bəzi digər qüvvələrin
də qərarları bəllidir. Biz bugünkü tədbirə yalnız burada iştirak edən bəyləri
deyil, təxminən burada iştirak edənlərdən bir neçə dəfə çox digər siyasiləri,
ekspertləri, cəmiyyətdə cəsarətli mövqe sərgilədikləri barədə görüntü yaratmağa
çalışan bir çox insanları da dəvət etmişik. İstər onların, istərsə də burada
iştirak edən hörmətli qonağımızın bu mövzuda fikirlərini eşitmək istərdik.
İnanıram ki, sonda ortaq mövqe əldə eləməyimiz tamamilə realdır”.
Müsavat Divanının üzvü, iqtisadçı-ekspert Qubad İbadoğlu mövzu ilə bağlı ortaya
çıxan iqtisadi və hüquqi məsələlərdən, məsuliyyətdən danışdı: “Azərbaycanda 1
milyon 300 min pensiyaçı var. Orta pensiya məbləği hökumətin hesabatında deyilir
ki, 104 manatdır. Bu, o deməkdir ay ərzində Sosial Müdafiə Fondundan pensiyalar
üçün 140 milyon manat xərclənir. 75 milyon dollar vəsait imkan verir ki, bütün
pensiyaların məbləğində əhəmiyyətli dəyişikliklər edilsin. Dövlət büdcəsindən il
ərzində elmə ayrılan vəsaitin həcmi 98 milyon manatdır. Belə müqayisələri çox
apara bilərik. Biz ortaya çıxan fakta həm iqtisadi, həm də hüquqi qiymət
verməliyik. Hüquqi qiymət çox önəmlidir. Təkcə seçki qanunvericiliyində nəzərdə
tutulmuş normalar bu faktla ciddi şəkildə pozulur. Seçki Məcəlləsində 58-ci
maddənin tələbləri var. Keçirilən seçkilərdə hər bələdiyyə üzvlüyünə,
deputatlığa, prezidentliyə namizəd öz gəlirlərinin mənbəyi, növü, məbləği barədə
rəsmi müəyyən olunmuş formanı doldurmaqla məlumat verməlidir. Əgər məlumat
düzgün deyilsə və ya düzəlişə ehtiyacı varsa, 48 saat ərzində düzəldilməlidir.
Eyni zamanda qanunun tələbinə görə, namizəd mülkiyyəti, əmlakı barədə də rəsmi
məlumat verməlidir. Həm 2003, həm 2008-ci il prezident seçkilərində
prezidentliyə namizədlərin illik gəliri və əmlakı barədə forma var. 2003-cü il
seçkiləri ilə bağlı deyə bilərəm ki, sözügedən sənəddə İlham Əliyevin yalnız bir
əmlakının olduğu yazılırdı. İlham Əliyevin gəliri haqqında konkret rəqəm
yazılıb. Qeyd olunan gəlirlər dəyəri on milyonlarla dollar olan mülklər almağa
imkan vermir. Yüksək vəzifə tutan şəxslərin biznes fəaliyyətini isə qanun
qadağan edir. Yüksək vəzifə tutan şəxslərin bizneslə məşğul olması hüquqi
məsuliyyət yaradır. Yüksək vəzifəli şəxsin dəyəri 55 manatdan yuxarı olan
hədiyyə qəbul etməsi də qanunda məsuliyyət nəzərdə tutur. Xaricdə mülklərin
alınması məsələsi vergi nöqteyi-nəzərindən də qiymətləndirilməlidir. Hesab
edirəm ki, bu istiqamətlərdə həm iqtisadçılar, həm də hüquqşünaslar
araşdırmalarını davam etdirməlidir. Seçki Məcəlləsinin tələblərinin pozulması
halı baş verdiyi üçün MSK-ya sorğu ilə müraciət edilməlidir. Araşdırmaları
xaricdə də aparmaq mümkündür. Ən azı artıq əlimizdə fakt var ki, Dubayda məlum
alqı-satqı əməliyyatı gedib. Ora sorğular göndərməklə vergi və digər məsələlərlə
bağlı daha geniş məlumatlar almaq imkanları var”.
Azadlıq Partiyasının sədri Əhməd Oruc Dubayda mülk faktının hakimiyyətin xalqın
vəsaitini talan etməsinin daha bir sübutu olduğunu bildirdi: “Oğurluqla məşğul
olan hakimiyyət bir oğurluq faktı Amerika tərəfindən açılan kimi yenilənmiş
təhlükəli Madrid prinsiplərini qəbul etdiyini rəsmən bəyan elədi. Bu fakt onu
göstərir ki, hakimiyyət yol verdiyi cinayətlərin ortaya çıxmaması üçün
Azərbaycanın milli maraqlarını hər an qurban verə bilər. Bu hakimiyyət
Azərbaycanın milli maraqları üçün böyük təhlükəyə çevrilib... Ona görə də biz bu
hakimiyyətin istefasını tələb edirik".
Müsavat Məclisinin sədri Sülhəddin Əkbər İlham Əliyevin istefa verməsi tələbi
ilə son dərəcə kəskin çıxış etdi: “İlham Əliyev izahat verməlidir. Əsaslı izahat
verə bilmirsə, istefa verməlidir. Çünki ölkəyə bunca vurduğu ziyan kifayətdir.
Niyə sən korrupsiyaya, qanunsuzluğa yol verərək sənə, ölkənə təzyiq edilməsi
üçün faktlar verirsən? Olmazmı ki, Azərbaycanı korrupsiyaya bulaşmamış, heç bir
cinayəti olmayan insanlar idarə etsin? Hansısa kənar təzyiq olanda da belə insan
çıxsın meydana, xalqı, bütün siyasi qüvvələri arxasında görsün və hər hansı
məsələyə görə kənar təzyiqlərin qarşısında duruş gətirsin. Korrupsiyaya
bulaşmış, xaricdə on milyon dollarlarla ölçülən mülklər alan adam necə ordunun
Ali Baş Komandanı ola bilər?! Zabitlər, əsgərlər biləndə ki, onların Ali Baş
Komandanının 11 yaşlı oğlunun təkcə bir xarici şəhərdə 44 milyonluq mülkü var,
həmin Ali Baş Komandanın arxasınca gedərmi?! Belə bir Ali Baş Komandanın
arxasınca hansı ordu gedər?! İlham Əliyevin nə sağa, nə sola baxdığını spiker
bəyan etdi. Yalnız korrupsioner, diktatura ölkələrində bu cür olur. Bu
hakimiyyət bir vulkan dağının ətəyində tikilmiş gözəl, böyük malikanəni
xatırladır. Vulkandan öncə qazlar çıxır. Bunun ardınca lava başlayır. Lava
püskürməyə başlayanda həmin dağın ətəyində olanlar külə dönür. Bu hakimiyyət
uçuruma doğru gedir. Qorxulu odur ki, özü ilə bərabər Azərbaycanı da uçuruma
aparır. Biz İlham Əliyevə siyasi mesaj verməliyik. Həm özünün yaxınlarını, həm
YAP-ı, həm də Azərbaycanı sevirsə, ən düzgün çıxış yolu istefa verməkdir. ABŞ-ın
bütün dünyada nüfuzlu olan qəzetində dərc olunan həmin məqalə bir başlanğıcdır”.
Politoloq Ərəstun Oruclu bildirdi ki, ABŞ-da dərc olunan məqalə Qarabağ
məsələsində İlham Əliyevə təzyiq məqsədi daşımır: “Bu, sadəcə olaraq Azərbaycan
hakimiyyətinin demokratiya və digər geosiyasi məsələlərlə bağlı davranışına
cavabdır, siqnaldır. Hakimiyyət bunun davamının gələcəyindən qorxduğu üçün
təklif etdi ki, Qarabağ məsələsində razılaşmağa hazırdır. Ancaq bu gün fakt
ortadadır ki, hakimiyyətin bu təklifi qəbul olunmur. Baxın, Cənubi Qafqazın iki
ölkəsinin başçıları ABŞ-a dəvət olundu. Amma İlham Əliyev yenə də dəvət
olunmadı. Qarabağ məsələsi olsaydı, İlham Əliyevi Vaşinqtona çağırıb orada
tələblərini birbaşa irəli sürərdilər. Odur ki, həmin məqalənin Qarabağ
məsələsində güzəştə gedilməsi məqsədi güddüyü fikri yanlışdır. Hesab edirəm ki,
o məqalə bir startdır, ardı gələcək”.
Müsavat Partiyası Mərkəzi İcra Aparatının rəhbəri Arif Hacılı bildirdi ki,
Dubaydakı mülklər faktına münasibət siyasi qüvvələr üçün bir test rolunu
oynamaqdadır: "“The Washington Post” qəzetinin məqaləsi məhkəmənin hökmü kimi
bir şeydir. Orada dərc olunan məqalə, məqalədəki fakt İlham Əliyevin istefaya
getməsi zərurətini gücləndirən bir amildir. Əgər törətdiyin qanunsuzluğu əldə
əsas götürüb sənə Qarabağ məsələsində təzyiq edirlərsə, sən mütləq istefa
verməlisən. Sənin ölkənin gələcəyi, ərazi bütövlüyü təhlükə altına düşürsə, sən
ölkənin naminə istefa verməyə tələsməlisən. Məsələyə bu cür yanaşılmalıdır. Bu
məsələdə hansı mövqenin ortaya qoyulması real müxalifət məsələsində bir testdir
və real müxalifətin kimlər olduğunu ortaya çıxarır".
KXCP sədri Mirmahmud Mirəlioğlu bildirdi ki, bütün müxalifətin və cəmiyyətin
prosesə cəlb edilməsi işi aparılmalıdır. Buna nail olandan sonra istefa məsələsi
ciddi şəkildə ortaya qoyulmalıdır.
Müsavat başqanının müavini, deputat Arzu Səmədbəyli özünü əsl müxalifət
adlandıran bir sıra adamların parlamentin son iclasında 10 dəqiqəlik çıxışları
zamanı hətta Dubay sözünü dillərinə gətirə bilmədiklərini bildirdi: “Bu məsələ
kimin müxalifət olduğunu bir daha ortaya qoydu. Kim bu məsələdə İlham Əliyevə
istefa verməyi tələb edə bilirsə, gerçək müxalifət odur. İlham Əliyev Azərbaycan
naminə istefa verməlidir”.
Deputat Pənah Hüseyn haram yolla yığılan milyonların sonda həmin milyonları
toplayanların özünə dəhşətli fəlakətlər gətirdiyinin tarixdə dəfələrlə baş
verdiyindən və Azərbaycan büdcəsindən ildə 10 milyard manata yaxın vəsaitinin
korrupsiya yolu ilə mənimsənildiyindən faktlarla danışdı: “Ölkədə korrupsiyanın
təmərküzləşməsi ifrat həddə çatıb. Dubay mülkləri məsələsinin ortaya çıxması da
təsadüfi deyil. Oğurluqla əldə olunan böyük sərvət sonda fəlakət gətirir. Həmin
milyardlar onu toplayana qismət olmur. Dünyanı idarə edən güclər tərəfindən
mənimsənilir”.
AXCP sədrinin müavini Fuad Qəhrəmanlı, Böyük Azərbaycan Partiyasının sədri Elşad
Musayev, Müsavat başqanının müavinləri Qabil Hüseynli, Tofiq Yaqublu, Demokratik
İstiqlal Partiyasının sədri Şöhrət İsmayıl, Müsavat Məclisinin üzvü Asif
Məmmədli və digər ziyalılar da çıxışlarında prezidentin istefa verməsini tələb
etdilər. Sonda qərara gəlindi ki, çıxışlarda, xüsusilə də Q.İbadoğlunun
çıxışında irəli sürülən təkliflərin reallaşması istiqamətində lazımi addımlar
atılsın.
E.SEYİDAĞA, Yeni Müsavat, 26 mart 2010-cu il, Bakı