Növbəti toplantı

Bu gün Müsavat Partiyası Divanının növbəti toplantısı keçirilib. Qərarların icra vəziyyəti və görülən işlərə baxıldıqdan sonra partiyadaxili məsələlər barədə fikir mübadiləsi aparılıb.

Partiyadaxili məsələlər bölümündə bir sıra məsələlərlə yanaşı partiyanın Məclis üzvü, Mətbuat Şurası İdarə Heyətinin üzvü Tapdıq Abbasın Azərbaycan Milli Mətbuatının yaradılmasının 135 illik yubileyi münasibəti ilə keçirilən tədbirlərdə Heydər Əliyevin Fəxri Xiyabandakı məzarına əklil qoyma mərasimində iştirakı geniş müzakirə edilib. Çıxışlarda bu addımın yanlışlığı, onun Müsavat Partiyasının üzvü olmaqla bir araya sığmadığı dönə-dönə vurğulanıb, müxtəlif təkliflər səslənib.
Yekunda bütövlükdə Azərbaycanı, o cümlədən mətbuatı bərbad vəziyyətə salan bir siyasətçinin məzarını ziyarət törənində iştirakın yolverilməzliyi qeyd edilib. Divan Tapdıq Abbasın iclasdakı çıxışında bu hadisə ilə bağlı ifadə etdiyi səmimi etiraf və dərin peşmançılığı nəzərə alaraq ona xəbərdarlıq edilməsi ilə kifayətlənmişdir. Divan eyni zamanda inandığını bildirmişdir ki, Tapdıq Abbasa verilmiş bu partiya cəzası bütün müsavatçılara və demokratik düşərgənin üzvlərinə bir dərs olacaq. Tapdıq Abbas partiya Divanının verdiyi bu qərarla razılaşdığını, gələcək fəaliyyətində bütün bunları ciddi surətdə nəzərə alacağını bildirib.

İctimai-siyasi məsələlər bölümündə Divan real müxalifət qüvvələrinin 31iyul birgə etiraz aksiyasına hazırlığın və seçkilərdə birgə iştirakla bağlı məsləhətləşmələrin gedişini nəzərdən keçirib.

Toplantının sonunda cari məsələlərə baxılıb.

isagambar.az, 26 iyul 2010-cu il, Bakı