Növbəti toplantı

Bu gün Müsavat Partiyası Divanının növbəti toplantısı keçirilib. Qərarların icra vəziyyəti və görülən işlərə baxıldıqdan sonra partiyadaxili məsələlər barədə fikir mübadiləsi aparılıb.

Yığıncağın əvvəlində parlament seçkilərinə hazırlığın gedişatı müzakirəsi edilib. “AXCP-Müsavat” seçki blokunun namizədlərinə DSK-lar və icra strukturları tərəfindən yaradılan süni maneələr haqqında məlumat verilib. Eyni zamanda blokun namizədlərinin imzatoplama kampaniyasının uğurla davam etdiyi, seçicilərin onlara həvəslə imza vermələri qeyd edilib.

Toplantıda həmçinin oktyabrın ilk 10 günlüyündə kütləvi tədbirlərə başlamaq haqda qərar qəbul edilib.

Yığıncağın ictimai-siyasi vəziyyətə dair bölümündə BMT Baş Assambleyasının sessiyasında ABŞ prezidenti Barak Obamanın çıxışı və onun İlham Əliyevlə görüşü müzakirə edilib. Qeyd edilib ki, Barak Obama öz çıxışında həm də Azərbaycan iqtidarına demokratiya və insan haqları məsələsində ciddi mesajlar vermiş olub. Prezidentlərin ikitərəfli görüşündən daxil olmuş məlumatlara əsasən ABŞ-ın Azərbaycanda demokratik prosesləri daha prinsipial və ardıcıl müdafiə edəcəyinə inam ifadə olunub.

Toplantının sonunda cari məsələlərə baxılıb.

isagambar.az, 27 sentyabr 2010-cu il, Bakı