“AXCP–Müsavat” siyasi partiyalar blokunun B Ə Y A N A T I

1. “AXCP-Müsavat” siyasi partiyalar blokunun namizədlərinin seçki hüquqlarının pozulması faktları davam etməkdədir. 95 saylı Tərtər seçki dairəsindən blokun vahid namizədi Qabil Hüseynovun namizədliyinin qeydə alınması üçün imza verən şəxslərə təzyiqlərin olduğu haqqında məlumat verilmişdir. Qabil Hüseynov tərəfindən sənədlər dairə seçki komissiyasına təqdim edildikdən sonra ona qarşı edilən qanunsuzluqlar daha geniş vüsət almağa başlayıb. Belə ki, imza vərəqələrindəki adlara uyğun olaraq rayon isra hakimiyyətinin başçısı Vidadi İsayevin emisarları imza verən şəxslərin evlərinə gedir, müxtəlif yollarla onları verdikləri imzalardan imtina ərizəsi yazmağa vadar edirlər. Məsələn, sənədlər sentyabrın 28-də DSK-ya təqdim edildikdən sonra artıq 29 sentyabr saat 11-ə qədər 14 nəfərin müxtəlif məzmunlu məktublarla həmin orqana müraciət etmələri barədə DSK-nın sədri Həmid Mehdiyev tərəfindən Qabil Hüseynova məlumat verilmişdir. Bu prosesin günün sonrakı hissələrində də davam etdiyi şübhə doğurmur. Təzyiqə məruz qalanlar arasında Müsavat Partiyasının fəalları, o cümlədən rayon təşkilatının sədri Məmməd Xəqaninin adını xüsusi qeyd etmək lazımdır. Açıq görünür ki, yerli hakimiyyət orqanları Qabil Hüseynovun namizədliyinin qeydə alınmaması üçün lazımi hüquqi baza yaratmağa çalışırlar. Həm namizədin, həm də onun imza toplayanlarının qeyd etdiyi kimi, icra hakimiyyəti orqanlarının seçki orqanlarının işinə müdaxiləsi o dərəcəyə çatıb ki, seçki orqanları müstəqil surətdə qərarlar qəbul etmək, mövcud seçki qanunvericiliyinə uyğun hərəkətlər etmək hüquqlarından məhrum edilib. Özünün əsabələri vasitəsi ilə rayonda orta əsrlərə xas xof mühiti yaradan icra hakimiyyəti faktik olaraq rayonda normal seçki atmosferinin formalaşmasının qarşısını çoxdan alıb. Bu bir daha təsdiq edir ki, ölkə başçısının icra orqanlarının seçki orqanlarının işinə qarışmaması barədə göstərişləri Tərtər rayon rəhbərliyi tərəfindən yerinə yetirilmir.
“AXCP-Müsavat” siyasi partiyalar bloku 95 saylı Tərtər seçki dairəsində yaranmış bu anormal və qanuna zidd vəziyyətdən dərin narahatlıq hissi keçirdiyini bildirir və müvafiq orqanlardan bu özbaşınalığa təcili olaraq son qoyulmasını və günahkarların qanuna müvafiq olaraq cəzalandırılmasını tələb edir.

Bu hərəkətlər Seçki Məcəlləsinin kobud şəkildə pozur, siyasi hakimiyyətin namizədlərin bərabər rəqabət imkanlarını əsaslı şəkildə məhdudlaşdırır və seçkilərin qanuniliyini indidən şübhə altına alır.

2. “AXCP-Müsavat” siyasi partiyalar bloku bildirir ki, dairə seçki komissiyalarında olan özbaşınalıq halları gün-gündən artmaqdadır. Belə ki, 78 saylı Lerik seçki dairəsində deputatlığa namizəd Nobatəli Pələngov və onun səlahiyyətli nümayəndəsinə heç bir məlumat və sənəd verilmədən DSK onun namizədliyinin qeydə alınmaması haqqında qərar çıxarmışdır. Dəfələrlə dairə seçki komissiyasına müraciət etməsinə baxmayaraq, qərarın surətini hələ də namizədə təqdim etməyiblər.
25 saylı Nizami ikinci seçki dairəsində Yeni Azərbaycan Partiyasının namizədinin səlahiyyətli nümayəndələri tərəfindən seçicilərə pul paylanması halları müşahidə edilib ki, bu da Seçki Məcəlləsinin 88-ci maddəsinin kobud şəkildə posulmasıdır.

39 saylı Kəpəz birinci (Gəncə) seçki dairəsində deputatlığa namizəd Pərviz Həşimlinin səlahiyyətli nümayəndəsinə qarşı polis tərəfindən kobudluq edilərək, dairə ərazisindən uşaqlaşdırılmış, dairə seçki komissiyasında yetərsay olmadan P.Həşimlinin namizədliyinin qeydə alınmaması barədə qərar çıxardıqlarını bildirmiş, DSK-nın qərarını isə namizədə verməmişlər.

48 saylı Yevlax, 49 saylı Yevlax-Mingəçevir, 113 saylı Şəki şəhər seçki dairələrində blokun namizədlərinin imza vərəqələrinə imza atmış seçicilərə qarşı təzyiqlər edərək imzalarından imtina etməyə təhrik edirlər.

113 saylı Şəki şəhər seçki dairəsində deputatlığa namizəd Sahib Kərimovun səlahiyyətli nümayəndəsinin ticarət obyektinə qeyri-qanuni müdaxilə edərək, onun sənədlərinin surətlərini alıb getmişlər.

Dəfələrlə mətbuatda qeyd olunmasına, “AXCP-Müsavat” siyasi partiyalar blokunun səlahiyyətli nümayəndələrinin yazılı və şifahi müraciətlərinə və Mərkəzi Seçki Komissiyasının mətbuat xidmətinin rəhbəri Azər Sarıyevin mətbuata açıqlamasına baxmayaraq, namizədlərə əlavə imza vərəqələrinin verilməsi prosesində məhdudiyyətlər hələ də aradan qaldırılmayıb. 46 saylı Şirvan, 48 saylı Yevlax, 49 saylı Yevlax-Mingəçevir, 61 saylı Neftçala, 67 saylı Cəlilabad şəhər, 74 saylı Lənkəran kənd, 75 saylı Lənkəran-Masallı, 105 saylı Tovuz seçki dairələrində əlavə imza vərəqələri verilməsi haqqında müraciətləri ümumiyyətlə qeydə almaqdan imtina etmişlər.

“AXCP-Müsavat” siyasi partiyalar bloku bəyan edir ki, namizədlərə qarşı qanunsuz münasibət əslində hakimiyyətin bərabər rəqabət şəraitində demokratik seçki keçirmək istəyinin olmadığını göstərir və əvvəlcədən seçkilərin nəticələrini şübhə altına alır.

isagambar.az, 30 sentyabr 2010-cu il, Bakı