Müsavat
Partiyasının Başqanı İsa Qəmbər Sülhəddin Əkbəri 50 illik yubileyi münasibətilə
təbrik edib. Təbrikdə deyilir:«Hörmətli Sülhəddin bəy!
50 illik yubileyinizi təbrik edir, Sizə uzun ömür və cansağlığı arzulayıram. Siz Azərbaycan Xalq Hərəkatının ilk günlərindən bu hərəkata qoşulmuş, ölkəmizin müstəqilliyi, ərazi bütövlüyü və xalqımızın azadlığı uğrunda aparılan mübarizənin rəhbərlərindən biri olmusunuz. 1989-cu ildə xalq hərəkatının aparıcı təşkilatı olan Azərbaycan Xalq Cəbhəsi təsis edilərkən onun ilk idarə heyətinin üzvü seçilmisiniz. Xalq hərəkatının təşkilatlanmasında, onun ideyalarının yayılmasında mühüm rol oynamısınız. Siyasi mübarizəyə qatıldığınız ilk günlərdən müstəqil Azərbayan dövlətinin yaranması, azad, demokratik vətəndaş cəmiyyətinin formalaşması Sizin ən böyük amalınız olub. Bolşevik istilası dövründə mühacirətdə fəaliyyət göstərməyə məcbur olmuş Müsavat Partiyasının fəaliyyətinin ölkədə bərpa olunmasında yaxından iştirak etmiş, 1992-ci ildə yaranmış Bərpa Bürosunun üzvü olmusunuz.
1992-1993-cü illərdə Siz Milli Təhlükəsizlik Nazirinin birinci müavini kimi çox məsul və çətin bir vəzifədə çalışmısınız. Bu təşkilatının milliləşməsində, Sovet imperiyası dövründən qalma qalma bir qurumdan sözün həqiqi mənasında ölkənin təhlükəsizliyinə xidmət göstərən bir orqana çevrilməsi üçün fəaliyyət göstərmisiniz. Təəssüf ki, 1993-cü ilin iyununda ölkədə baş yermiş hərbi çevriliş nəticəsində digər islahatlar kimi MTN-də başlayan bu islahatlar da yarımçıq qaldı.
1993-cü ildən bu günə kimi Siz siyasi fəaliyyətinizi Müsavat Partiyasında davam etdirirsiniz. Uzun müddət partiya başqanın müavini vəzifəsində çalışmısınız. 2006-ci ildən isə Müsavat Partiyası Məclisinin sədrisiniz. Bu illər ərzində Siz həmişə öz prinsipial mövqeyiniz, azadlıq, demokratiya ideallarına sədaqətinizlə seçilmisiniz. Bu yolda ağır təhlükələrlə üzləşsəniz də, dəfələrlə həbsdə yatsanız da öz əqidənizdən dönməmisiniz. Bu gün Müsavat Partiyasının nüfuzu Sizin kimi silahdaşlarımızın çiynində qərar tutur.
Hörmətli Sülhəddin bəy!
Bir daha Sizi yubileyiniz münasibətilə təbrik edir, şəxsi həyatınızda xoşbəxtlik, ictimai-siyasi fəaliyyətinizdə uğurlar arzulayıram. İnanıram ki, uzun illərdən bəri apardığımız mübarizə öz bəhrəsini verəcək və Azərbaycanı azad, demokratik bir ölkəyə çevirəcəyik.