Müsavat Partiyasının başqanı İsa Qəmbər 18 Oktyabr – Milli Müstəqillik günü münasibəti ilə Azərbaycan xalqını təbrik edib.

Təbrikdə deyilir:

“Hörmətli həmvətənlər!

18 Oktyabr Milli Müstəqillik günü münasibəti ilə hamınızı təbrik edir, Sizə uzun ömür can sağlığı arzulayıram.

Düz 20 il bundan əvvəl, oktyabrın 18-də parlament tərəfindən “Müstəqlllik Haqqında Konstitusiya Aktı”nın qəbul olunması ölkəmizin ərazi bütövlüyü və müstəqilliyi uğrunda apardığımız mübarizənin yekunu və tariximizin şərəfli bir səhifəsidir. Ölkəmiz bolşevik istilası nəticəsində 1920-ci ildə itirdiyi müstəqilliyinə əsrin sonunda yenidən qovuşdu, 1918-20-ci illərdə böyük öndər M. Ə. Rəsulzadənin liderliyi ilə mövcud olmuş Azərbaycan Xalq Cümhuriyyətinin siyasi və hüquqi varisi olan yeni müstəqil dövlət quruldu. Həmin vaxt xalq hərəkatının lideri Ə. Elçibəyin rəhbərliyi altında hakimiyyətə gəlmiş demokratik qüvvələr az müddət ərzində geniş siyasi, hüquqi və iqtisadi islahatlara başladı, xalq cümhuriyyətinin yarrmçlq ideallarını həyata keçirməyi özünün əsas fəaliyyət istiqamətinə çevirdi.

Lakin 1993-cü ildə keçmiş kommunistlər qiyam yolu ilə yenidən hakimiyyətə yiyələndi və ölkənin inkişaf istiqamətlərini başqa tərəfə yönəltilər. Ölkədə demokratiya, azad vətəndaş cəmiyyəti qurulması əvəzinə avtoritar idarəçilik metodları tətbiq olunmağa başladı. Bu gün biz faktiki olaraq səriştəsiz idarəçiliyin ağır fəsadlarını yaşayırıq. Total korrupsiya cəmiyyətin bütün sahələrinə dərindən nüfuz eləyib, ölkə həm siyasi həm də sosial-iqtisadi böhran içindədir. Bir qrup adamın hədsiz varlanması müqabilində xalqın böyük hissəsi aclıq və səfalət içində yaşayır.

Belə siyasət həm də cəmiyyətdə böyük mənəvi düşgünlük yaradıb. Bütün müsbət dəyərlər sistemi alt-üst olub. İnsan hüquqları, söz, mətbuat azadlığı hər addımbaşı pozulur və ölkəmizin adı nüfuzlu beynəlxalq təşkilatların hesabatlarında çox pis hallandırılır. Vaxtilə Azərbaycanın müstəqilliyi əleyhinə çıxan insanlar “İstiqlal” ordeni ilə, digər yüksək dövlət mükafatları ilə təltif olunur, bütün ömrünü müstəqillik uğrunda mücadiləyə həsr etmiş fəallar isə təqib edilir, repressiyaya məruz qalırlar. Bu gün hətta Müstəqillik Haqqında Konstitusiya Aktına imza atmış Arif Hacılı da uydurma ittihamlarla həbsxanaya atılıb. Bu gün Azərbaycan həbsxanalarında ölkədə demokratiyanın və siyasi azadlıqların bərpa olunması üçün mübarizə aparan onlarla həmvətənimiz var. Onların arasında saxta ittihamlarla həbs olunmuş və ədalətsiz məhkəmə qərarları ilə həbsə salınmış xeyli gənc var. Bu gənclərin yeganə günahı məhz azad bir cəmiyyət qurmaq və belə bir cəmiyyətdə yaşamaq arzularıdır.
Lakin bütün bunlara baxmayaraq Müstəqilliymizin əldə edilməsi xalqımızın tarixində çox böyük bir hadisə idi. Bu, müstəqillik mücadiləsində iştirak edən yüz minlərlə insanın apardığı çox ağır və fədakar mübarizənin təntənəsi idi. Ölkəmizi müstəmləkəçilikdən qurtaran, onu müstəqil bir dövlətə çevirən xalq burada azad, demokratik bir vətəndaş cəmiyyətini qurmağa da nail olacaq. Həm də bu, çox yaxın tariximizdə baş verəcək.

Hörmətli həmvətənlər!

Mən bir daha Sizi bayram münasibəti ilə təbrik edir, hamınıza xoşbəxtlik, uğurlar və fəal vətəndaşlıq mövqeyi arzulayıram.

Tanrı Azərbaycanımızı qorusun!”

isagambar.az, 17 oktyabr 2011-ci il, Bakı